لماذا المكسيك من الدول التي تستحق الزيارة؟
يا مرحبا! المكسيك هي الوجهة اللي راح تشوف فيها أشياء غريبة كثير، المكسيك بلد غني بالتاريخ، والثقافة والاصالة، ومناظر طبيعية جميلة. المكسيك بلد مختلف عن كثير من البلدان، كل ولاية تتميز بحاجة عن الأخرى، المكسيك ما راح تشعر بالملل كل يوم في فعالية تشوفها، واحدة من أجمل البلدان اللي زرتها، في هذا المقال راح أشاركم معلومات عامة عن المكسيك.
المكسيك في قارة أمريكا الشمالية، حدودها من الشمال مع أمريكا، ومن الغرب المحيط الهادي، ومن الشرق خليج المكسيك. عاصمتها مكسيكو سيتي، اللي تعتبر واحدة من أكبر مدن العالم بالسكان. المكسيك متنوعة بشكل ما ينوصف، من صحاري وشواطئ، إلى جبال وغابات خضراء. عدد سكانها أكثر من 120 مليون، وهي مزيج بين حضارة المايا والأزتيك القديمة، والثقافة الإسبانية اللي تلمسها بكل شارع وزاوية.
متى تزور المكسيك؟
أهم شيء تفكر فيه قبل لا تسافر هو الوقت المناسب بالنسبة لك. المكسيك بلد كبير مكون 32 ولاية، وكل ولاية لها طقسها. بس غالبا في الصيف تكون حر زي عندنا، الوقت الأنسب للزيارة ما بين نوفمبر الى ابريل، الجو يكون حلو ومعتدل عامة، بس انا راح أتكلم عن كل مدينة على حدة، فاراح أتكلم عن الجو في كل مدينة.
الأكل المكسيكي؟
الأكل المكسيكي من أحد الأسباب اللي تخليك تزور المكسيك. التاكو، الانشيلادا، الجواكامولي والاكلات الاخرى. الاكل البحري كمان شي ثاني. المشروبات المكسيكية زي الماء المنعشة اللي تجي بنكهات متنوعة أشهرها الهور شاتا بدون نطق الهاء. ترى كل ولاية لها اطباق تختلف عن الولاية الأخرى، فاراح اطرق الى الاكل المكسيكي في مقال لحاله.
الأمان؟
عشان أكون واضح معاك. ناس كثير تسأل: هل المكسيك آمنة؟ الجواب نعم، لكن زي أي بلد ثاني، في أماكن تحتاج تكون فيها حذر. المدن السياحية عامة تكون آمنة جدًا للسياح بسبب كثرة الشرطة، والشعب المكسيكي هنا جدا حبوب، اهم شي التزم بالنصائح العامة: لا تتخشخش في كل مكان، وخليك منتبه على أغراضك في الأماكن العامة المزدحمة. السلطات المكسيكية شغالة على تعزيز الأمان في المكسيك وخصوصا المناطق اللي يزورها السياح.
السفر من الدول العربية إلى المكسيك؟
السفر من عندنا للمكسيك ياخذ وقت، لكن زيارة المكسيك تستحق عناء السفر. أغلب الرحلات تمر عبر أمريكا او اوروبا. لو كنت من السعودية، تقديم الفيزا سهل جدًا عن طريق السفارة المكسيكية، وإذا كان عندك فيزا سياحية امريكية تقدر تدخل بها المكسيك. انا شخصيا عندي الفيزا السياحية الامريكية ودائما اسافر للمكسيك عبر أمريكا لان الرحلات أسعارها أرخص مقارنة عبر أوروبا، في ديسمبر ممكن تكون الأسعار مرتفعة بسبب الأعياد. الرحلة تعتبر طويلة، لكن أول ما توصل وتشم هواء المكسيك، راح تنسى كل التعب.
السفر بين المدن في المكسيك؟
التنقل داخل المكسيك مرة سهل. عندك خيارات كثيرة: الطيران الداخلي بأسعار مناسبة، أو الحافلات الفاخرة اللي مريحة جدًا. المدن الكبيرة زي مكسيكو سيتي وغوادالاخارا فيها مواصلات عامة ممتازة، وراح أشارك تجربتي مع وسئل المواصلات سواء الطيران او المترو او الباصات.
هل المكسيك غالية؟
المكسيك تعتبر من الدول اللي تناسب كل الميزانيات تحصل فيها السكن الرخيص والاقتصادي والغالي. الاكل نفس الشي. الأنشطة السياحية أسعارها جدا معقولة. ممكن أقدر أقول المكسيك تناسب جميع طبقات المجتمع.
المكسيك بلد يسرق قلبك بجماله وتنوعه. سواء كنت تحب التاريخ، الطبيعة، أو الأكل، صدقني المكسيك بتكون من أحلي الوجهات اللي زرتها وماعمرك راح تنساها. البلد مليان حياة وروح، تستأهل الزيارة، وراح تعيش أجواء مختلفة في المكسيك الساحرة.