السياحة في المكسيك: هل المكسيك تستحق ان تكون وجهة سياحية للسياح العرب؟

يا مرحبا! اعطيني فرصة اكلمك عن الدولة الملقبة بجوهرة الأمريكيتين(المكسيك) هي الوجهة اللي تحدث فيها أشياء غريبة كثير، بلد غني بالتاريخ، والثقافة والاصالة، ومناظر طبيعية جميلة. بلد مختلف عن كثير من البلدان، كل ولاية تتميز بحاجة عن الأخرى، المكسيك ما راح تشعرون بالملل كل يوم في فعالية تشوفونها، واحدة من أجمل البلدان اللي زرتها ومازلت اروحها، في هذا المقال راح أشاركم معلومات عامة عن المكسيك

المكسيك تقع في قارة أمريكا الشمالية، حدودها من الشمال مع أمريكا، ومن الغرب المحيط الهادي، ومن الشرق خليج المكسيك. مساحتها جدا كبيرة تقريبا مليون وتسعمائة واثنين وسبعين الف كيلومتر مربع، وهي الدولة 14 على العالم من حيث المساحة، فيها 32 ولاية، وعاصمتها مكسيكو سيتي، اللي تعتبر واحدة من أكبر مدن العالم بالسكان. اللغة الاسبانية وفيه لغات محلية كلغة المايا وأخرى.  المكسيك متنوعة بشكل ما ينوصف، من صحاري وشواطئ، إلى جبال وغابات خضراء. عدد سكانها أكثر من 120 مليون، وهي مزيج بين حضارة المايا والأزتيك القديمة، والثقافة الإسبانية اللي تلمسها بكل شارع وزاوية بسبب احتلال اسبانيا لها لمدة 300 سنة

لماذا المكسيك تستحق الزيارة؟

طبعا الاغلب مننا عندنا صورة مسبقة ان المكسيك بلد جرائم وعصابات ومثل ما نشوف في الأفلام ونسمع في الاخبار بس المكسيك غير ذلك. المكسيك بلد مليان حضارات تاريخية، زي المايا والأزتيك، ومعالمها مثل أهرامات “تيوتيهواكان” و”تشيتشن إيتزا” اللي تعتبر من عجائب الدنيا السبع. إضافة لذلك، الشعب المكسيكي متمسك بالعادات والتقاليد، راح تشوفون حاجات غريبة في المكسيك زي احتفال يوم الموتى وايام أخرى، ترى كل ولاية لها احتفالاتها الخاص

من الأسباب اللي تخليك تزور المكسيك الاكل المكسيكي، معلومة الاكل المكسيكي ترى مصنف من أفضل 5 مطابخ على مستوى العالم اعتقد كان في المرتبة الثالثة بعد اليوناني او الإيطالي بس ماني متأكد هو في المرتبة الثالثة او الرابعة. الاغلب يعرف التاكو والانشلادا والجواكامولي والقائمة طويلة وفي اكلات كثير يمكن ما تعرفوها والاكل البحري كمان شي ثاني. طبعا المشروبات حقتهم لذيذة مثل الهورتشاتا حتى الكولا هنا طعما غير. حتى القهوة المكسيكية كمان لذيذة اسمها Café de olla   معها قرنفل، والشوكولاتة والحلا المكسيكي كمان، طبعا راح اتطرق للمأكولات المكسيكية في عدة مقالات

 الطبيعة في المكسيك حاجة ثانية الجبال والشلالات والحدائق الوطنية شي ما يوصف، اوه الشواطئ في المكسيك جدا جميلة ومن أشهر المدن اللي فيه شواطئ فيها كنكون وبلايا ديل كارمن وفي مدن كثير وراح اتطرق لها في مقال معين

والشعب المكسيكي جدا طيب ويحب يساعد ويرحب بجميع الناس من الجنسيات المختلفة ودائم مبتسم وما تشعر انكم غرباء بينهم والتواصل معهم جدا سهل، سواء كنت في الأسواق المحلية أو في المناطق الريفية الصغيرة. وهذا من أحد الأسباب اللي خلاني ازور المكسيك أكثر من مرة. وراح أشارككم رحلاتي في جميع مدن المكسيك وراح تعرفون أسباب زيارتي للمكسيك

 يبدا من نوفمبر الى ابريل وهذا يعتبر مثالي لمعظم المسافرين، لأن الأجواء تكون معتدلة ومشمسة، وخصوصًا في الوجهات الشاطئية زي كنكون وبلايا ديل كارمن. ويكون مناسب الى استكشاف المدن، والاسترخاء على الشواطئ، والاحتفال بالمهرجانات مثل (يوم الموتى) في نوفمبر

 يبدا من مايو الى أكتوبر تكون غزيرة لكنها قصيرة، وغالبًا بعد الظهر. المناطق الطبيعية مثل الغابات والجبال تكون خضراء ومناسب لمحبي الطبيعة والمغامرات، مثل زيارة الأدغال أو الغوص في الكهوف (السينوتيس)

 يكون الجو حلو ولطيف للفعاليات يعتبر الوقت مثالي لزيارة المكسيك إذا كنت مهتم بمهرجانات الكرنفال والاحتفالات الثقافي

واللي ما يحب المواسم السياحية المزدحمة، حاول زيارة المكسيك خلال أكتوبر أو نوفمبر قبل ذروة موسم السياحة وخذو في الاعتبار أن المدن الكبيرة مثل مكسيكو سيتي ومدن اخرى تكون معتدلة طوال العام بسبب ارتفاعها عن سطح البحر. من الأخير أنسب وقت للزيارة هو بين نوفمبر وأبريل من وجهة نظري عشان الأجواء تكون معتدلة ومناسبة لمعظم الأنشطة السياحية

زي ما ذكرت سابقا المكسيك جدا كبيرة، واغلب الاخبار اللي تنتشر عنها تكون من القنوات الإعلامية الامريكية، زي ماحنا عارفين ان الاعلام الأمريكي له قوة مؤثرة في العالم، صورة المكسيك عند الاعلام الأمريكي غير جيدة ودائما يركز الاعلام الأمريكي على الجانب السلبي في المكسيك، مازال هذا الشي له أثر كبير على سمعة المكسيك، فالصورة النمطية عن المكسيك عند اغلب الناس سلبية. لكن الواقع عكس ذلك المناطق السياحية دائما امنة للسياح والسلطات المكسيكية في السنوات الأخيرة شغالة على مستوى عالي لتعزيز نسبة الأمان. المكسيك زيها زي أي دولة ثانية، في أماكن مفروض الواحد يتجنبها زي المناطق النائية والمعزولة، لكن المناطق السياحية الامن متواجد فيها بكثرة، مع العلم ترى السياحة لدى المكسيك تعتبر من مصادر الدخل الأساسية، حماية السياح عامل مهم لهم. المناطق الحدودية دايم يكون فيها مشاكل ولها أسباب كثيرة. اهم شي خليكم في المناطق السياحية، يفضل عدم ارتداء المجوهرات الثمينة والملابس اللي تلفت النظر، لازم الواحد يكون منتبه على اغراضه خاصة في الأماكن المزدحمة زي مثلا في القطارات يعني في عندهم ناس محترفة في النشل، الشي يروح من الشخص في لمحة بصر وهذا يحصل في دول كثير. ودايم في أي مكان استخدم وسائل النقل الموثوقة يعني اوبر يعني حتى التاكسي اتجنبها أفضل لك. داري طولت عليكم في النقطة هاذي، بس معلومة عالسريع فيه مدينة في المكسيك اسمه مريدا عاصمة ولاية يوكوتان احتلت المرتبة الثانية من ناحية الامان مدينة في قارة أمريكا الشمالية بعد مدينة في كندا

المكسيك تعتبر من الدول اللي تناسب كل الميزانيات تحصل فيها السكن الرخيص والاقتصادي والفاخر. الاكل نفس الحكاية فيها رخيص وغالي الأنشطة السياحية أسعارها جدا معقولة. التكلفة دايم في السفر تعتمد على حسب الشخص من نواحي كثي

 خلينا نأخذ مثال على التكلفة في مكسيكو سيتي يعني الهوستل في الليلة يكلف من 10 الى 30 دولار، الفنادق من 3 الى 4 نجوم تكلف من 50 الى 120 دولار والفنادق الفاخرة تبدأ من 150 دولار وأكثر. الاكل في المطاعم المتوسطة من 10 الى 20 دولار والمطاعم الراقية من 30 دولار وانتا طالع. للمواصلات تذكرة المترو بنصف دولار، وكمان اوبر ما هو غالي إذا التنقل داخل المدينة يكلف من 3 دولار الى 10 دولار. الأنشطة السياحي مثلا زيارة المواقع التاريخية زي متحف الأنثروبولوجيا الوطني التذكرة ب 5 دولار، زيارة ” حديقة تشبولتبيك” مجانا والقلعة في اللي في الحديقة سعر التذكرة 5 دولار. والجولة السياحية إلى أهرامات تيوتيهواكان تكلف حوالي من 40 الى 80 دولار على حسب الشركة السياحية. وانا راح افصل في هذا الموضوع بشكل أكثر لمن اكتب مقالات عن الأنشطة السياحية في كل مدينة

السفر بين المدن في المكسيك فيه خيارات كثيرة عندكم الطيران والباصات واكيد السيارات الخاصة. انا شخصيا جربت الطيران والباصات. بالنسبة للباصات كنت اخذها إذا كانت الرحلة ما تتجاوز أربع ساعات بالكثير يعني إذا كنت ذاهب من مدينة الى مدينة في نفس الولاية او ولاية جدا قريبة لان الأسعار أرخص بكثير مقارنة بالطيران. اما الطيران دايم إذا كنت ذاهب من ولاية الى ولاية. بالنسبة للطيران خطوط Volaris وViva Aerobus هاذي اقتصادية وتجربتي مع الاثنين جدا ممتازة والاسعار ممتازة مع مراعاة وقت الحجز انا دايم احجز بدري عشان احصل أفضل سعر. بالنسبة لخطوط Aeroméxico ما قد سافرت عليها لأنها أسعارها مرتفعة عن باقي الخطوط ومع العلم هيا الناقل الوطني لكن ممتازة بناء على اراء الناس. شخصيا انا ما سفرت بين المدن بسيارة وصراحة ما أفضل مع العلم انو عندي رخصة دولية. وانا لمن أشارك تجاربي معاكم راح اذكر ماهي وسيلة المواصلات اللي استخدمتها في كل رحلة  

السفر الى المكسيك يأخذ وقت، اغلب الرحلات تمر عبر أمريكا وأوروبا والاسعار جدا تتفاوت. ما عمري سافرت دايركت على المكسيك دايم اروح عبر أمريكا واقضي فيها يوم وبعدين على المكسيك. على سبيل المثال رحلتي الأخيرة من المكسيك الى السعودية سافرت من جدة الى سان خوسيه في ولاية كاليفورنيا بس كان في ترانزيت في لوس انجلوس لمدة 3 ساعات ونصف. الرحلة من جدة الى لوس انجلوس كانت 16 ساعة دايركت على الخطوط السعودية وبعدين كملت على سان خوسيه وجلست في سان خوسيه ليلة والصباح سافرت على المكسيك عبر خطوط الاسكا وكانت الرحلة 3 ساعات تقريبا. طبعا التخطيط للرحلة يعود على حسب الشخص بس انا شخصيا أفضل اسافر الى الولايات الامريكية القريبة من المكسيك واجلس فيها يوم وبعدين انطلق على المكسيك. بالنسبة الى الأسعار انتا وشطارتك يعني الرحلة من السعودية الى المكسيك كلفتني تقريبا 800 دولار من السعودية الى كاليفورنيا كانت التذكرة ب 512 دولار والتذكرة من أمريكا الى المكسيك ب 251 دولار. بس ترى تقدر تحصل أرخص او أغلي هذا الشي يعتمد على التوقيت، انا استخدم سكاي سكنر عشان يساعدني في معرفة كيف أوصل الى وجهتي بأفضل الأسعار واقل الأوقات والطريقة هاذي أتوقع الاغلب منكم يعرفها

انا كسعودي مطلوب مني فيزا لزيارة المكسيك، الحصول على فيزا لزيارة المكسيك سهل الحصول عليها من سفارة المكسيك في الرياض وطريقة التقديم جدا سهل على حسب موقع السفارة المكسيكية. انا شخصيا ما عندي فيزا مكسيكية لكن عندي الفيزا الامريكية والفيزا الامريكية تتقدر تستخدمها لزيارة المكسيك وتسمح لك بالجلوس في المكسيك لمدة 6 شهور. الفيزا الامريكية لها مميزات انها تسمح لك دخول بعض الدول من غير فيزا وهذا الشي جدا مريح ويتخصر وقت كثير.

وفي الختام حاب اقولكم ان المكسيك من الدول اللي تستأهل انو الواحد يزورها، دولة تتميز بعدة حاجات زي الثقافة والتاريخ والطبيعة والاكل والشواطئ فكل ولاية وكل مدينة داخل كل ولاية لها عاداتها وتقاليدها. في المكسيك راح تشوف عادات وتقاليد جدا غريبة تقريبا في كل مدينة. دولة تستحق عناء السفر، بس اهم شي الشخص لمن يبغى يزور المكسيك يعني تكون فترة الزيارة على الاقل عشرين يوم خاصة السياح من الدول العربية لانو الرحلة طويلة وهذا راي الشخصي يعني اعرف واحد جاء المكسيك عشرة أيام فقط، وقضى 10 أيام في مدينة وحدة، الرحلة الى المكسيك تحتاج الى تخطيط ممتاز. ورحلاتي في المكسيك ان شاء الله راح توضح لكم، كم هيا جميلة المكسيك